Strong Bear and The Boxer

 
 

A story told by Dickie Moss.

 

Tei'ox

 

Play Ceh'e3itoo.

 

howoo   he’ih’ii3eeno’   nehe’  tei’ox, heetou’  boo3eti3i’;

nihii koo’einoxoeyoone’  ni’iitou’u,

wootii   hiikokoyoxoeni’,   cii3iihi’   niitiine3eiheti3i’.

wohei  nihtesiini  no’oteiht, niiseiht  nihoo3oo.

he’neen  niitobeekuut  nuhu’ boo’oet.

“wohei,”  nii3oohkoni’ “hiibeexiineyei3ihoo, heibeexiboo3oo.”

“hoowuuni,”   heehehk.

“hoowuuni.

neebeh’esiihiihoo,   wo’ei3  heebeh- howoo  neebehnoh’oo.

neihoowbeetnee’eestoo.

noh   nihto’obeinoohok,  wootii  ho’nookeen  heeto’owoot;

noh  to’owoohok,   noh   siineihoowoe’in heetni-

wohoe’etwonoo3iine’etii,”  he’ih’ii.

noh  ne’nih’iisciini’owoo3i’.

“neebeh’esiiniihoo.

hoownee’ee3e’eenoo nuhu’  hees-  nuhu’  heesno’oteihinoo,

hetni’eenesiinii3einoo.

hoowuuni,  honoot  nii-  niinotoonoo3ou’u neito’eino’, wo’ei3   howoo

niiheniihi’, neneeninoo,” he’ih’ii.

wohei  ne’nih’iisiini,  nihii...

“hoowuuhu’  tohbiineenoo   nuhu’  no’oteihiit;

‘oh   niiheyoo   nohkuusi’i’oonoo.

nohkcebii’oonoo.

hi’in nenee’:  nee’eesno’oteihinoo.

‘oh  neihoowbeeti’eenesiiniihoo nenitee.

neihoowbeeti’kocoo’o3ihe’   nenitee honoot ni’eeneecihi’woonou’u

neito’eino’, wo’ei3  howoo niiheniihi’ neneeninoo.

noh   nuhu’  nenee’ he’ih’iiciini’oobeeno’.

“hoowuuni,”  he’ih’ii.

to’obeinoohok   wootii  ho’nookeen heeto’owoot,

noh   hinee to’owoohok, ‘oh   neihoowoe’in wohoe’etwonoo3iine’etii.

noh  nuhu’  nenee’  neihoowbeeti’-   kookoni’koco’o3ihoo.

nuhu’  no’oteheihii   neenehno’oteiht.

neenehiini.

neihoowbeettooto’oe-  neihoowbeetitenowuunoo   no’oteihiit.

wohei  ne’nih’iisinihiit,; noh ne’nih’ii3eeciini’oowoo3i’.

nohuusoho’.

Word-by-Word Translation

Full Text Translation